Wednesday, March 18, 2015

Pantun Jambi Menyayat Hati

Batanghari aeknyo tenang,
Sungguhpun tenang deras ke tepi;
Anak Jambi jangan dikenang,
Kalu dikenang merusak hati.

Hidup api pangganglah kuwau,
Kuwau dipanggang si abang kaki;
Maksud hati nak meraih pulau,
Pulau dijago si nago sakti.

Kami ba umo di lereng bukit,
Rebahlah padi digiling batang;
Kami umpamo si burung pipit,
Kemano terbang di halau urang.

Lubuk pungguk tepian napal,
Tempat budak mencuci baju;
Awak biduk nak serempak kapal,
Idaklah mungkin nyo samo laju.

Kalu ado gelang di tangan,
Idak melurut cincin di jari;
Kalu ado tunang awak nian,
Idak merebut si tunang kanti.

Bederai hujan di rimbo,
Tibo di padi bederai jangan;
Becerai kito di muko,
Namun di hati becerai jangan.

Kalu ado mobil ke Bungo,
Numpanglah aku ke Rantau Panjang;
Kalu ado gadis butanyo,
Katokan aku sudah tabuang.

Muaro Bungo medan buperang,
Jepang masuk Belando lari;
Hilang bungo dapat dikarang,
Hilang kau ke mano kucari.

Kota Bangko bepagar bilah,
Kota Jambi bepagar besi;
Kota Bangko kutinggal sudah,
Kota Jambi tempat ku jadi.

Seberapo rimbun kayu di Jambi,
Rimbunlah jugo kayu di Tungkal;
seberapo rindu kau nan pegi,
Rindulah jugo kami nan tinggal.

Ke talang pegi mulatah,
Pegi merumput lanyo padi mudo;
Malang nian nasib kau antah,
Tibo lah di mulut tebuang jugo.

Anak cino menanam ubi,
Ubi tetanam dimakan babi;
Anak siapo nan bepantun tadi,
Cubolah diulang sekali lagi.

Macam mano awak nak mandi,
Banyak lah bilah daripado buluh;
Macam mano awak nak jadi,
Banyak yang negah pado nyuruh.

Macam mano awak nak mandi,
Anak buayo di bawah titin;
Macam mano awak nak jadi,
Adek kayo abang musekin.

Cik Siti mngepang rambut,
Rambut tekepang sebelah kanan;
Kalu sudi surat disambut,
Kalulah idak buang ke laman.

Cubo-cubo main galumbang,
Sampai ke tepi membao tampah;
Cubo-cubo menanam mumbang,
Nasib baik negeri betuah.
loading...

0 komentar:

Post a Comment

Artikel ini belum lengkap tanpa komentar anda!
Silahkan berkomentar yang santun dan cerdas, tidak menghina, tidak memaki dan tidak menyebar kebencian. Terima kasih